KALIBO, Aklan—“On going” makarun ro construction it mga daeanon partikular ro mga nasamad nga tulay sa pilang ka mga barangay sa banwa it Libacao.
Sa pihak kara, ginpahayag ni Libacao Mayor Charito Navarrosa nga naghimo eamang sanda it “band-aid solution” agud nga ma-agihan it mga residente ro nasambitan nga mga tulay.
Temporaryong gintambakan it mga bato ro tulay sa Barangay Rosal, Loctuga ag Manika samtang ginahueat ro sabat it Department of Interior and Local Government Unit (DILG) sa andang ginpadaea nga request.
Ginahueat man sigon nanda nga mairelease ro funding nga kapin sa 10 million maghalin sa Aklan provincial government agud nga mapaayos ro tulay sa Barangay Magugba nga nagakonekta paadto sa Barangay Agmailig, Canauan ag Cotabato.
Ginapahayag dugang nga indi pa matapos ro buean it Hunyo hay ginaeauman man maaprubaan ro proyekto it Philppine Rural Development Program kung sa siin paga-ayuson kara ro daean sa barangay Manika, Oyang ag Dalagsaan.
Samtang, nagtaeana man it kapin sa 68 million pesos nga budget ro LGU it banwa para sa igapatindog nga isolation ag evacuation center sa barangay Rosal kaibahan ro detachment it mga katapo it kapulisan nga sa makarun hay gina-umpisahan eun ro pag-construct.
Samtang nagpaabot man it pag-simpantiya si Libacao Mayor Charito Navarrosa sa pamilya Teodosio ag Orbista bangud sa pagkamatay it Sangguniang Bayan Member sa banwa it Libacao kamana man ro anang asawa kara.
Nagpadumdom man raya sa naaywan nga pamilya it mga namatay nga padayun nga maging positibo ag magbueoligan agud nga maeampasan ro ginapangatubang nga problema.
