KALIBO, Aklan—Ginpromisa it bag-ong OIC general manager it Aklan Electric Cooperative (Akelco) sa mga miyembro/konsumidor nga paga-obrahon it anang administrasyon ro tanan agud nga mapamayad pa ro andang serbisyo.
Suno kay Ms. Mega A. Mortalla nga maskin nga temporaryo pa eamang ro anang posisyon, nagapangayo imaw it suporta ag kooperasyon sa mga opisyal ag empleyado agud nga eubusan nga mapaayos ro anang pagdumaea sa kooperatiba.
Nasayuran nga matapos nga mag-retiro si dating general manager alexis Regalado ko Mayo 3 hay imaw ro gin-endorso it Akelco Board of Directors.
Si Mortalla nga sangka accountant hay tubong Lezo ag dating finance department manager it Akelco.
Gindugang pa kara nga prayoridad nanda makaron ro clearing operation it mga linya it kuryente agud nga malikawan ro mga owa ginaeauman nga power interruption eabi pa ag nagsueod eon ro tiempo it tag-uean.
Padayun man sigon ro andang pagplano kun paalin nga mapatigayon ro dag-unan nga Annual General Membership Assembly (AGMA) pinaagi sa virtual bangud nga bawae pa ro pagtipon-tipon tuga it pandemya.
Kadungan kara, nag apela man imaw sa mga miyembro-konsumidor nga magbayad it andang electric bills bangud nga haeos 90 porsiyento sigon it andang koleksyon hay naagto sa power generators, transmission ag mga buwis ag ro 10% hay para sa andang operasyon.
Aminado man ro akelco nga maskin ro andang koleksyon hay apektado man sa paghina it industriya it turismo sa isla it Boracay.
