KALIBO, Aklan—Nagdaog ro tatlong ka mga penikula nga himo it sangka Aklanon ag Associate Professor sa York University, Department of Dance, Canada nga si Dr. Russ Patrick Alcedo sa nagtapos nga Silk Road Film Festival Awards sa Cannes, France.
Ro Silk Road Film Festival Award hay sambilog sa mga award giving bodies nga nagapili it manami nga mga penikula kada dag-on agud nga maipaguwa sa France.
Ro documentary film nga himo ni Dr. Alcedo hay , “A Will To Dream,” nga nakabatun it award nga Best Dance Feature Documentary ag ro daywang ka mga matag-od nga documentary nga “They Call Me Dax” ag “Am I Being Selfish?” nga nakabatu man it Best Dance Short Documentary ag Best Short Inspirational Documentary.
Ro mga nasambitan nga penikula hay hango sa kabuhi it mga underprivileged ballet dancers sa Manila ag Quezon City nga nakasentro sa kabuhi it manugturo nga si Luther Perez nga ginpabay-an ro anang US Green card agud nga mag-uli it Pilipinas ag makabulig sa mga pamatan-on nga mahilig sa pagsaot.
Ro mga iba pang personalidad nga una sa likod it madinaeag-on nga penikula hay sanday Alex Felipe (videography and stills), Alec Bell (editing and color and sound correction), Peter Alcedo, Jr. (musical scoring), JM Soberano (additional videography and aerial shots), Paolo Alcedo (transcription) ag Mark Gary and Denisa Reyes sa (archival footage).
