KALIBO, Aklan–Owa naakusahan it anuman nga personal corruption sa sueod it anang an-um nga termino si dating pangueong Benigno “Noynoy” Aquino III.
Raya ro ginpahayag it batikang abogado nga si Atty. Axel Gonzales.
Suno kana nga gindumog it maabu nga mga negosyante ro administrasyong Aquino rason nga nakaangkon it mabahoe nga pag-umwad sa ekonomiya it nasyon.
Apang matapos sigon nga magpanaog sa pwesto, naging kontrabida imaw sa mata it mga naga-idolo sa nagbueos kana nga si pangueong Rodrigo Duterte.
Bangud kara, owa man napugngan ni Atty. Gonzales nga ikumpara ro daywang naging presidente it Pilipinas.
Ginpuna man nana ro pagbalewala ni Duterte sa kadaeag-an it Aquino administration sa isyu it West Philippine Sea sa international arbitration kontra sa China.
Sa anang termino man sigon nakasuhan ag nakulong si dating pangueong Gloria Macapagal Arroyo sa sueod it limang dag-on bangud sa corruption charges.
Nabulgar man sa anang administrasyon ro “mother of all scams” angot sa P10 billion pesos nga pork barrel funds nga ginaeakipan ni Janet Lim Napoles bilang mastermind ag kakunchaba ro limang senador ag 23 nga kongresista.
Sa pihak nga parte, gindugang pa ni Atty Gonzales nga gin-uyog man it daywang ka nagapangunang eskandalo ro presidency ni Noynoy Aquino bangud sa alegasyon nga palpak nga pagdumaea kara.
Raya hay ginaeakipan it Luneta hostage crisis ko 2010 kun sa siin 8 nga turista halin sa Hong Kong ro napatay kamana man ro trahedyang natabu sa Mamasapano ko 2015 nga ginkamatay it 44 nga miyembro it Special Action Force nga kahimuan it mga rebeldeng moro.
Sa pangkabilugan suno kay Atty. Gonzales, si Aquino hay makabig nga mabuot, simpli, disente, honest ag nagasunod sa laye.
