KALIBO, Aklan—Bangud sa maka-alarma nga pagtaas it kaso it COVID-19 sa banwa it Kalibo ag bilog nga probinsiya it Aklan, uman nga nag-apela ro lokal nga gobyerno it Kalibo sa publiko nga seryosohon ro mga ginapatuman nga health protocols partikular ro nakabaehag sa executive order nga ginpaguwa ni Governor Florencio Miraflores.
Suno kay Kalibo Mayor Emerson Lachica nga raya eamang sa makaron ro pinaka nagapangunang kinahangean agud nga masuk-ean ro pagkalhit it virus.
Nataeupangdan suno kana nga may pila nga owa nagapati sa halit it COVID, rason nga nagapasaway ag owa nagasunod sa mga ginapatuman nga protocols eabi eon ro mga nagapatigayon it mga okasyon nga sangka pag-eabag sa mass gathering.
Gindugang pa ni mayor Lachica nga kinagangean nga magkooperar anay ro tanan agud nga indi eon magbuhay ro ginapatuman nga pag instrikto kapareho it naexperiensiyahan makaron.
Sangkiri nga pag antus eon lang suno kana ag posibleng sa masunod nga dag-on hay maangkon eon ro ginahandum nga pagiging covid free it bilog nga nasyong Pilipinas.
