KALIBO, Aklan—Owa it anuman nga pagabag-uhon sa kaundan it pinaka-ulihi nga ginpaguwa nga Executive Order ni Aklan Governor Florencio Miraflores sa pihak nga igapaidaeum ro probinsiya it Aklan sa General Community Quarantine (GCQ) umpisa Hulyo 1 hasta 31, 2021.
Ro paghugut it quarantine classification nga ginrekomenda it national IATF hay tuga it gulping pagtaas it kaso it COVID-19 sa probinsiya.
Nagaeaum si Governor Miraflores nga magaserbing paandam sa publiko ro naging desisyon it IATF agud nga magsunod sa health and safety protocols.
Sandig sa EO it gobernador, bawae nga magguwa ro mga naga edad it 18 anyos panaba ag 65 anyos pataas.
Kaibahan pa sa mga bawae hay ro social gatherings, limitadong capacity it religious activities sa 30 percent, ag sarado anay ro mga dine-in nga serbisyo it mga restaurants ag iba pang kaean-an , barberya, mga salons ag gyms.
Hugut man nga ginapatuman ro border control checkpoints sa mga banwa ag barangay kamana man nga ro mga ginpasugtan eamang sa lamay it patay hay ro mga miyembro it pamilya.
Mag-eowas kara, magapabilin man ro curfew ag liquor ban.
