KALIBO, Aklan—Ginkalipay ag ginpasaeamatan ni Kalibo mayor Emerson Lachica ro pagpasugot it Department of Education ukon Deped-Aklan nga gamiton makaron bilang COVID-19 quarantine facility ro daywang ka eskwelahan sa barangay Poblacion partikular ro KISEC ag Kalibo Elementary School.
Suno kay Mayor Lachica nga nauna sanda nga nakipag angot kay Schools Division Superintendent Dr. Miguel Mac Aposin ag insigida man raya nga nagpasugot sa andang request.
Ginakabig sigon nga epicenter it COVID-19 ro kalibo rason nga haeos punuan eon ro andang mga gintaeana nga quarantine facility nga ginaeakipan it daywang ka hotel ag evacuation center sa Brgy. Tigayon Kalibo.
Mabahoe sigon ro maibulig it daywang eskwelahan bangud nga tig-20 nga kwarto ro sarang nanda nga maipagamit.
Natigayon eon suno kana nga na-inspection ro lugar ag angay ag bagay man raya nga gamitong quarantine facility bangud nga kompleto sa mga gamit mag-eowas sa wifi nga nakataeana pa nga pagabutangan.
Target sigon nanda nga igabutang kara ro mga magpamilya, magkatrabaho ag magkabarkada nga nakaangkon it covid infection.
