KALIBO, Aklan—Eubos ro pagkasubo it sangka retired seaman matapos nga paeson ro pangaean it anang misis sa listahan it mga senior citizen nga makabaton it bueanan nga pension halin sa gobyerno.
Suno sa tagreklamo nga si Jimmy Tordillos nga owa nana ginaeauman ro gupyadang pag-kansela sa pangaean it anang asawa sa listahan it mga senior citizen nga mataw-an it social pension.
Gin-istorya it tagreklamo nga ko Hulyo 1 may nag-adto nga mga miyembro it Office of Senior Citizens Affair ukon OSCA-Lezo sa andang baeay para impormahan ro anang asawa nga ginbuoe eon raya sa listahan.
Raya hay sa pihak it nagahilapit nga payout nga nakataena sa masunod nga dominggo.
Eubos man sigon ro anang pagka-dismaya matapos nga mag-adto imaw sa opisina it OSCA para mag-usisa kat abisuhan imaw nga mag-adto eon lang sa region ukon national office para ipaabot ro anang reklamo.
Nagaeaum man si Tordillos nga mapukaw ro igtueopangod it natungdan nga ahensya it gobyerno kamana man nga maipaathag kanda it mayad ro rason kun ham-an ginkakas ro pangaean it anang asawa sa listahan.
Sa pihak nga parte, gin-insister man ni Kalibo Sangguniang Bayan member Augusto Tolentino nga indi pwedeng ma-qualify ro sangka senior citizen nga may ginabaton nga pension ukon may pamilya nga nagapangita sa ibang nasyon.
Suno kana, ro social pension hay kaparte it Indigency program it gobyerno.
Ro mga indibidwal sigon nga ginabueo sa listahan hay pagabayluhan it mga kwalipikadong benepisyaryo.
Samtang, makabig sigon nga violation of pension plan kun ro sangka DSWD official hay pagataw-an it slot ro anang pamilya nga may ikasarang sa kabuhi.
