KALIBO, Aklan—Nagaeaum ro Aklan Provincial Government nga pagapamatian it National Inter Agency Task Force (IATF) ro apela kara nga ipabilin anay sa General Community Quarantine ukon GCQ ro quarantine classification it probinsiya.
Kasunod raya it naging anunsiyo it National IATF angot sa pagrekomenda nga ipaidaeom sa Modified Enhanced Community Quarantine (MECQ) ro Aklan umpisa sa Hulyo 16 hasta 31, 2021.
Ssuno kay Ibajay Mayor ag League of the Municipalities of the Philippines (LMP) -Aklan Chapter President Jo-en Miraflores nga gapangayo pa sanda it tiyansa nga maipakita sa national IATF nga masarangan it mga Local government unit ukon lGU nga punduhon ro padayun nga pagtinaas it kaso it covid-19.
Nauna kara, nagdihon it pag-apela ro provincial government pamaagi kay Governor Florencio Miraflores agud nga ipabilin anay sa GCQ ro probinsiya.
Mag-euwas sa Aklan, ginrekomenda man nga ipaidaeum sa MECQ ro Bacolod, Antique ag Capiz.
Samtang enhanced community quarantine man ukon ECQ sa Iloilo City ag Iloilo Province.
Ro Guimaras ag Negros Occidental hay nakataeana man nga ipaidaeum sa general community quarantine ukon GCQ.
Samtang sa pihak nga parte, ginklaro man ni Miraflores nga nag-request it dugang nga suplay it bakuna ro probinsiya sa national government pamaagi kay Senator Christopher “Bong” Go.
Ko nagtaliwan nga mga adlaw hay may nag-abot eun sigon nga dugang nga suplay it bakuna nga himo it Sputnik V.
Apang ginklaro man kara nga ro pag-alokar it Department of Health ukon DOH sa mga bukana hay nakadepende sa ginasumite nga listahan it lokal nga gobyerno kung pila ro mga gustong maturukan it bakuna sa andang lugar.
