KALIBO, Aklan—Gintalakay sa ginpatigayun nga public hearing it Sangguniang Panlalawigan it Aklan kaibahan ro mga miyembro it Office of the Provincial Veterinarian (OPVET)-Aklan ko adlaw it Martes ro ginbaeay nga ordinansa para sa pagbilog it Bantay ASF sa Barangay ukon BABay ASF program.
Tuyo kara nga protektahan ro hog industry sa probinsya sa nagapadayun nga pagpanaeasa it African Swine Fever (ASF).
Suno kay Dr. Joseph Lachica, Veterinairan II it OPVET-Aklan nga ro Western Visayas eon lang sa nabilin nga ap-at nga rehiyon ro owa pa nasudlan it makamaeatay nga virus tuga it ASF.
Target sigon it BABay ASF nga makahimo it epektibong monitoring, surveillance, ag reporting system kontra ASF.
Igaeakot sa implementasyon it nasambit nga programa ro barangay councils ag mag deputize it mga volunteer barangay bio-security officers ag mga pribadong veterinarians sa pagdumaea it OPVET-Aklan.
Gin-engganyo man kara ro publiko nga insigidang i-report ro anuman nga makadueudang pagkamatay it mga baboy sa andang mga lugar agud nga insigidang matapna ro mas pang pagkalhit it virus.
Sa makaron hay nagapadayun ro hugut nga monitoring it OPVET-Aklan sa mga pantalan ag paeuparan sa nasyon kabulig ro Bureau of Animal Industry ag iba pang natungdan nga ahensiya it gobyerno sa pagsueod it mga posibleng kontaminadong karne ag pork products agud nga indi raya makasueod sa probinsiya.
