KALIBO, Aklan—Ginkumpirma it Department of Education ukon deped-aklan nga magabukas ro klase para sa school year 2021-2022 sa maabot eon nga Setyembre 13, 2021.
Raya hay matapos nga aprubahan ni Pangueong Rodrigo Duterte ro nasambit nga petsa halin sa tatlong petsa nga opsyon nga ginrekumenda ni Education Secretary Leonor Briones.
Apang suno kay Dr. Miguel Mac Aposin, schools division superintendent it DepEd-Aklan nga ginahueat pa nanda ro opisyal nga dokumento kara halin sa national office.
Gindugang pa ni Dr Aposin nga naunang ginproponer it deped nga magbukas ro klase sa agosto 23 apang ginpamalibaran raya it mga manugturo ag mga estudyante samtang pangaywa sa ginpropose nga petsa ro setyembre 6, 2021.
Posible man sigon nga igapaguwa eon it deped ro school calendar para sa nagahilapit nga school year sa mas madali nga tiempo.
Sa pihak nga parte, ginpahayag ni dr aposin nga makaron nga adlaw ro umpisa it pormal nga bakasyon it mga estudyante matapos nga hasta eon lang kahapon ro mga pagpatigayon it end of school year rites.
Kapareho suno kana it nagtaliwan nga school year, igapatuman sa gihapon ro blended learning para sa school year 2021-2022 bangud sa COVID-19 pandemic.
