KALIBO, Aklan—Nagpanindugan ro Municipal Inter-Agency Task Force it Banga nga bawae eon nga mag-home quarantine ro mga Coronavirus Disease ukon COVID-19 positive.
Suno kay Ms. Donnalyn Siyambio, tagapaghambae it Banga IATF nga raya hay sa atubang it pag-insister it pilang mga pasyente nga positibo sa sakit nga magapabilin sa andang baeay imbes nga daehon sa mga quarantine facilities.
Ginmanduan sigon sanda ni Aklan Governor Florencio Miraflores nga kinahangean nga ibutang guid sa quarantine facility nga aprubado it gobyerno ro mga pasyenteng may mild ukon owa it sintomas it coronavirus.
Raya hay matapos nga mataeupangdan it Provincial IATF nga maabu sanda nga mga naka-home quarantine nga covid positive.
Tuyo sigon kara nga masiguradong masunod ro mga quarantine protocol kumpara sa kun magapabilin sanda sa sueod it andang mga baeay.
Raya man sigon ro ginaturo nga rason it pagtaas it kaso it deadly virus sa nasambit nga banwa, kun sa siin hay naeakip sanda sa high risk nga classification.
Sa pihak nga parte, ginatutukan sigon nanda makaron ro mga barangay it poblacion ag cerrudo bangud sa nailistang kaso it covid 19 nga halin sa sangka pamilya.
Kaabuan sigon sa mga pasyente hay ro high risk contact it mga nauna eon nga nagpositibo sa sakit.
Bangud nga haeos mapuno eon ro andang gintaeana nga local covid center nga sangka hotel sa banwa it kalibo hay ginakonsidera nanda nga butangan it covid positive ro andang mga barangay isolation unit.
Sa makaron ro banwa it Banga hay may kabilugan nga 407 nga kaso umpisa nga mag-eupok ro pandemya kon sa siin 85 kara ro aktibong kaso ag waeo ro namatay.
