KALIBO, Aklan—Gin-umpisahan eon it Aklan Electric Cooperative ukon Akelco ro imbentaryo sa tanan nanda nga mga poste sa probinsiya it Aklan agud nga maresolba ro isyu may kaangtanan sa mga ginareklamong nagabaeanggangat ag nagalaylay nga mga “wiring” it mga telephone ag cable companies eabi eon sa banwa it Kalibo.
Suno kay Akelco OIC General Manager Mega Arcenio-Mortalla nga nakataeana nanda nga pagatalayon ro isyu sa “spaghetti wires” sa Lunes nga adlaw, Hulyo 19 kaibahan ro mga kompaniya nga may naga-eksister nga joint pole agreement sa Akelco.
Tuyo suno kana it consultative meeting nga maistoryahan ro paghimos sa mga luma ag owa eon naga-function nga wiring eabi eon ro mga nakakabit sa poste it Akelco.
Pagakakason man sigon nanda ro mga gabok ag luma eon nga poste nga padayun nga ginakabitan it mga wiring it telephone ag cable companies.
Ginpahayag ni Mortalla nga ro mga spaghetti wires ag gabok nga poste hay nagatuga it peligro sa kabuhi it tawo ag propiyedad.
Mag-eowas kara, makabig man raya nga eye sore eabi eon sa mga turista.
Sa oras nga makahimo it kasugtanan hay paga-umpisahan ro pag-ayos it mga installations ag mga nagabaeanggangat nga wiring.
Sa pihak nga parte sa bilog nga buean it Agosto, pagahiwaton ro district election it board of director sa tanan nga 10 nga distrito.
Suno kay Mortalla nga owa nanda gindungan ro pagboto agud nga malikawan ro pagtipon-tipon it mga tawo sa mga gintaeana nga voting precincts.
Umpisa lunes hasta biyernes ro pagboto.
Ginpaguwa eon man sigon nanda ro listahan it mga kwalipikadong botante sa tanan nga barangay.
