KALIBO, Aklan—Kapin sa 125 nga bag-ong kaso ro nadugang sa listahan it mga tinamaan it Coronavirus Disease 2019 ukon COVID-19 sa probinsya it Aklan.
Base sa pinakaulihing datus it Provincial Health Office (PHO)-Aklan, raya hay ginakaeakipan it 34 nga bag-ong kaso halin sa banwa it Kalibo, 33 sa Ibajay, 13 sa Numancia, waeo sa Nabas, tig an-om nga kaso sa Balete, Buruanga ag Madalag, lima sa Banga ag New Washington, ap-at sa Batan, daywa sa Makato ag tig sambilog sa banwa it Libacao, Malay ag Tangalan.
Bangud kara, sumaka eon sa 6,008 ro kabilugan nga kaso COVID-19 sa probinsya umpisa nga magtuhaw ro pandemya.
Sa pihak kara, 47 man ro nadugang sa listahan it mga nagmayad rason nga humampak eon sa 4,766 ro total recoveries matapos ro pagbueong ag quarantine procedure.
Samtang, lima man ro bag-ong nailistang namatay matapos nga dapuan it deadly virus rason nga nag-abot eon sa 132 ro death toll it probinsya.
Sa makaron, 1,110 pa ro nabilin nga aktibong kaso nga ginaeakipan it 942 naka-facility quarantine, 81 nga naka-home quarantine ag 87 nga admitted sa COVID ward it Aklan Provincial Hospital.
