KALIBO, Aklan—Bukon it pabor ro Bagong Alyansang Makabayan ukon Bayan-Aklan nga padayunon pa ro pagpatigayon it COVID-19 mass testing sa probinsiya it Aklan kapareho it nagakatabu sa makaron.
Suno kay Kim Sin Tugna, Provincial Coordinator it Bayan-Aklan nga bangud kara hay padayun nga nadudugangan ro numero it mga kaso it deadly virus.
Raya man sigon ro ginabasehan it national government sa pagpatuman it mas instrikto nga quarantine levels nga eubus eon nga naka apekto sa mga negosyo ag pangabuhian it mga pumueuyu.
Ro importante suno kana makaron eabi pa ag flu season ukon tiempo it trangkaso nga masabat ro kinahangeanon it mga pumueuyu nga may sakit partikular ro pagtau kanda it nagakaigo nga bueong.
Ginpahayag dugang nga haeos magkapareho ro sintomas it trangkaso ag covid 19.
Samtang, gindayaw man kara ro tikang makaron it probinsiya it Antique pinaagi kay Governor Rhodora Cadioao kun sa siin hay owa eon masyadong naga-panic ag owa eon ginatutukan ro mass testing ag sa baylo hay ginataw-an it importansiya ro pagpabueong sa mga nagamasakit ag ro pagpadasig sa andang vaccination program.
Nauna eon nga ginpahayag ni Aklan Governor Florencio Miraflores nga posibleng magbalik sa MECQ ro probinsiya pagkatapos it Hulyo 22 bangud sa padayun nga pagtaas it kaso it COVID-19.
