KALIBO, Aklan—Ginkalipay it Aklanon director, writer ag producer ro pagdaog it anang pelikula bilang Best Documentary Short film sa Cannes Indies Cinema Awards.
Ro penikulang “They Call Me Dax” hay sangka 10 minutong tagalog documentary film sa direksyon it Aklanon filmmaker nga si Patrick Alcedo.
Raya hay istorya it sangka 15-anyos nga dalagita nga halin sa pobre nga pamilya nga gingamit ro hilig sa pagsaot agud nga makatapos it high school ag nagahandum nga makahaw-as sa kapigaduhon bilang ballet dancer.
Sa interview it Bombo Radyo, ginpaathag ni Alcedo nga kapareho it sikat nga Cannes Film Festival, ro Cannes Indies Cinema Awards hay sangka international online competition nga naga-sakdag ag nagasuporta sa mga independent filmmakers ag screenwriters.
Ginpahayag pa kara nga masadya ag nasorpresa imaw nga nataeupangdan ro anang pelikula sa sangka international competition.
Bangud kara, mas gando sigon imaw nga maghimo it maabu pa nga mga documentary films.
Si Alcedo hay halin sa pamilya it mga musikero ag dancers it Aklan, kun sa siin nagbahoe imaw nga nagasinaot kada Ati-atihan festival.
Imaw hay presenteng nakabase sa Toronto, Canada ag nagatindog nga chair ag associate professor sa Department of Dance sa York University.
Nasayuran nga bukon it raya ro unang kahigayunan nga nakabaton imaw it pagkilaea matapos nga ro anang kauna-unahang feature length documentary nga “A Piece of Paradise” hay gindeklara man nga Best Canadian Film Award ag Best First Feature Film Award sa 2017 Toronto Reel Asian International Film Festival.
