KALIBO, Aklan—Plano makaron ni Kalibo Sangguniang Bayan member Augusto Tolentino nga maghimo it resolusyon nga nagahinyu kay Philippine National Police (PNP) Chief General Guillermo Eleazar nga maeakip ro Kalibo Municipal Police Station sa 171 nga priority unit nga pagataw-an it mga body-worn camera.
Suno kay Tolentino, raya hay kaparte it 2,696 body cameras nga nag-abot sa Pilipinas.
Nagaeaum man imaw nga mapasugtan raya it PNP Chief eabi pa ag ro Kalibo hay kabisera it Aklan.
Engkaso nga matabo, mabahoe raya nga bulig bilang ebidensya sa parehong miyembro it operatiba ag mga sibilyan.
Mabahoe man sigon ro maibulig it video footage it body cam sa pag-file it kaso kamana man nga malikawan ro alegasyon nga planted ro ginkasa nga operasyon.
Sa rayang pamaagi, malikawan eon ro pag-abuso it mga pulis sa andang trabaho kamana man sa mga kriminal nga ginabaliskad ro sitwayson agud nga ibutang sa aeang-aeang ro mga law enforcement agency.
