KALIBO, Aklan—Mabahoe ro maibulig it dahon it clavo agud nga makalikaw sa makamaeatay nga sakit nga coronavirus disease ukon COVID-19.
Raya ro ginpahayag ni Dr. Rey Lebaquin, sangka medical expert sa Aklan sa tunga it na-eksperyensiyahan nga “surge” it covid -19 cases sa probinsiya.
Suno kay Dr. Lebaquin nga imaw mismo ro nakapamatuod sa bisa it dahon it clavo para sa mga nakabatyag it sintomas it covid-19.
Ro dapat eamang sigon nga ubrahon hay pabukaean raya ag imnon ro anang tubi.
Ginpahayag dugang nga imaw mismo ro sambilog sa mga nakapamatood kung paalin nga nakabulig kana ro nasambitan nga herbal.
Sa makarun hay owa eun sigon imaw nahadlok pa sa covid-19.
Kamatuoran sigon kara hay maabo man ro anang mga ginpa-inom it ginpabukaean nga clavo ag maskin sanda hay nag-aprroved man sa bisa kara.
Sa pihak kara, gin-engganyo man ni Dr. Lebaquin ro publiko nga magpacheck up sa doktor kung may may trangkaso.
Importante man nga pabaskugon ro immune system pamaagi sa pagkaon it mga masustansiya nga pagkaon ag ro mga tinoean-on nga una sa “BAHAY KUBO”.
Importante man suno pa kana ro pagkaon it malunggay bangud raya hay manggaronon sa bitamina nga makabulig sa kaeawasan agud nga sok-ean ro nagkaeain eain nga klase it masakit.
Samtang sa pihak nga parte, ginpahayag man ni Dr. Lebaquin nga may unang risgo engkasong magbatun it booster shots it covid-19 vaccine ro sangka indibidwal.
Apang sa pihak kara, nakadepende man sigon sa World health organization ro guidelines angot kara bangud magapaidaeum man anay sa nagakaigo nga patuon antes nga maipatuman ro nasambitan nga tikang.
