KALIBO, Aklan—Ginpaidaeom sa mas hugut nga quarantine classification ukon Modified Enhanced Community Quarantine (MECQ) ro bilog nga probinsya it Aklan umpisa Agosto 1 hasta Agosto 15, 2021.
Raya hay sandig sa ginpagguwa it National Inter-Agency Task Force (IATF) Resolution No. 130-D nga pirmado ni Department of Health (DOH) Secretary Francisco Duque III ag gin-aprubahan ni Pangueong Rodrigo Duterte.
Madumduman nga ginpaabot ni Aklan Governor Florencio Miraflores ko adlaw it Sabado sa ginpatigayun nga pueong it Regional Inter-Agency Task Force (RIATF) ro hinyu kara nga ipasaka ro quarantine status it probinsya halin GCQ with heightened restriction sa MECQ sa sueod it 15 diyas.
Tuyo kara nga mapugngan ro pagtinaas it kaso it COVID-19 infection sa Aklan kamana man nga malikawan ro pagkalhit it nagkaeain-eain nga variants.
Nasayuran nga base sa record umpisa Hulyo 18, 2021, ro COVID-19 cases sa Aklan hay owa naganaba sa 140 kada adlaw ag may daywa hasta tatlong pasyente ro nagakamatay.
Samtang, una eon man sa high risk level ro healthcare system it probinsya.
