KALIBO, Aklan—Nagpaabot it suporta kay Eumir Marcial ro sambilog sa anang mga maeapit nga amigo ag kaeapit-baeay matapos nga makasueod sa semifinals it men’s boxing tournament sa nagapadayun nga 2020 Tokyo Olympics.
Sa interview it Bombo Radyo Kalibo, ginpahayag ni Jowin Perez it Brgy. Lunzuran sa Zamboanga City nga halin sa pamilya it mga boksidor si Marcial rason nga bata pa eamang hay nakahiligan eon nana ro nasambit nga sports.
Sa edad nga pitong dag-on hay naga-boksing eon sigon raya sa idaeum it pag-train it anang ama.
Mag-eowas sa boxing, paborito man sigon ni Marcial ro paghampang it basketball.
Madumduman nga ginpierde ni Marcial ro pambato it Armenia nga si Arman Darchinyan via knockout.
Bangud sa anang pagdaog, sigurado eon ro anang bronze medal sa Olympics.
Gindugang pa ni Perez nga mabahoe ro anang pagpati nga mapiyerde man it anang amigo ro masunod pa kara nga maka engkwentru para sa pag angkon it silver ukon dugang nga gold medal para sa Pilipinas.
Bangud sigon sa anang abilidad sa boksing dugang pa nga naka agi raya nga mag-training sa Wild Card Gym sa idaeum ni Hall-of-Fame trainer Freddie Roach sa bulig ni Senador ag eight-division champion Manny Pacquiao hay masarangan kara nga patumbahon ro anang makaengkwentru.
Samtang, mag-eowas sa suporta it mga pumueuyong Pilipinhon, nagpangayo man it pangamuyo si Perez agud nga mabo-oe kara ro gold medal sa Summer Games.
Ro masunod nga maka-bakbakan ni Marcial hay ro presenteng European champion nga si Oleksandr Khyzhniak it Ukraine sa Agosto 5.
Bangud sa madasig nga kadaeag-an ni Marcial sigurado eon ro pilipinas nga maka-uli it ikatlong medalya, kauna-unahan sa Philippine boxing nga makaangkon it multiple Olympic medal.
