KALIBO, Aklan—Kinahangean nga mapasiguro nga masunod ro protocol engkaso nga imbes nga cremation hay makaangkon eon lang it burial grounds para sa mga bangkay nga nagpositibo sa COVID 19.
Raya ro ginpahayag ni Sangguniang Panlalawigan member Atty. Harry Sucgang matapos nga ginmandu ni Aklan Governor Florencio Miraflores sa 17 nga alkalde it probinsiya nga magpahaum it eubnganan bangud sa temporaryong pagpundo sa operasyon it partner crematorium facility kara sa siyudad it Iloilo umpisa ko Agosto 2 bangud sa kaabuon it mga ginadaea nga bangkay idtu adlaw adlaw.
Gindugang pa ni Atty. Sucgang nga owa nanda natalakay nga mga provincial board members ro angot sa nasambit nga isyu bangud nga masyado sigon nga naging kampante ro probinsiya nga indi maka abot sa makarondaya nga sitwasyun.
Madumduman nga daywang bangkay eon it COVID positive ro gin-eubong ko nagtaliwan nga adlaw sa magkaseparadong sementeryo sa banwa it Kalibo.
Nasayuran nga base sa protocol , kinahangean nga maeubong eagi ro bangkay sa sueod it 12 oras pagkatapos nga bawian it kabuhi.
Ro kutkot hay dapat nga may daeum nga 6 feet ag kinahangean nga nakabutang ro selyadong bangkay sa metal casket.
Ginasugid nga naga abot sa ap-at hasta lima ro nagakamatay nga COVID 19 kada adlaw sa Aklan.
Angot kara, uman nga nag apela si atty sucgang nga hugut nga magsunod sa minimum health standard agud nga indi eon magtinaas pa ro kaso it deadly virus sa probinsiya.
