KALIBO, Aklan—Gin-uean it pagdayaw ro mga Filipina golfers nga sanday Bianca Pagdanganan ag Yuka Saso sa andang naging hampang sa unang round it women’s individual golf competition sa nagapadayun nga 2020 Tokyo Olympics.
Suno kay Bombo Samurai Correspondent Josel Palma nga ginakaeakipan it mga top 10 sa world ranking ro nasambit nga kompetisyon nga ginpatigayun sa Kasumigaseki Country club.
Ro Pinay golfer nga si Pagdangangan hay nagtapos sa pang pitong pwesto sa round 1 samtang ro reigning US women’s champion nga si Saso hay nakibaka man para sa anang Olympic debut kun siin nag-pwesto imaw sa rank 48.
Ginpasiguro sigon ni Saso nga maga-bawi imaw sa masunod nga hampang agud nga maka-pwesto sa mas mataas nga ranking.
Angot kara, naging hangkat man sa mga atleta ro masyadong mainit nga tyempo sa Tokyo.
Ro mismong coach man ni Saso nga si Miko Alejandro ro nagtindog kara nga caddie matapos nga gindaea sa ospital ro perming kaibahan kara nga si Lionel Matichuk bangud sa heat stroke.
Si Matichuk hay naging caddie ni Saso ko Agosto 2020 kat anang mabuoe ro US Women’s Open kamana man ro daywang daog sa Japan LPGA.
