KALIBO, Aklan—Haum nga makipag-partner ro lokal nga gobyerno it Kalibo sa sangka funeral homes para sa pagpatindog it crematorium para sa mga namatay nga COVID-victim.
Suno kay Kalibo Mayor Emerson Lachica nga ro nasambit nga plano hay igapaagi sa Public Private Partnership ukon PPP.
Ro ginaduso nga joint venture sa tunga it local government unit it Kalibo ag sangka funeral homes hay may sharing nga 60/40.
Sa makaron hay gina enggayo sigon nanda ro nasambit nga funeral homes nga magsumite it proposals agud nga andang ma-review.
Sa inisyal nga pag-istorya, ginkasugtanan nga ro LGU ro maga-usoy it lote samtang ro funeral homes ro maga-construct it building.
Ro pagpatindog it crematorium hay ginproponer matapos nga nagpamalibad eon nga magbaton ro naga-isaeahanon nga crematory sa bilog nga isla it panay sa siyudad it Iloilo bangud sa kaabuon it mga ginadaea idtu nga bangkay.
Mag-eowas kara, gin abisuhan eon ro mga aklan mayors nga magpahaum it COVID burial grounds.
Gindugang pa ni mayor Lachica nga ro ginaproponer nga pagpatindog it kaugalingon nga crematorium hay agud nga indi eon masyadong magastusan ro mga himata it mga mamatay bangud sa COVID-19 ag bilang sambilog man sa nagapanguna nga covid response it banwa.
Engkaso nga madayun hay pagabuligan sigon nanda ro nasambit nga funeral homes nga maasikaso ro mga kinahangeanon nga requirements agud nga maumpisahan ro operasyon sa mas madali nga tiempo.
Sa makaron hay padayun pa nga naga-usoy it eugta nga may eapad nga mga 1,000 square meters nga pagabutangan it crematorium agud nga maumpisahan ro construction.
Nakapadaea eon sigon imaw it sueat sa sangguniang bayan para sa nasambit nga joint project.
Nasayuran nga naga abot eon sa 6 ro namatay sa covid nga gin-eubong sa pilang municipal ag private cemetery sa Kalibo.
Base sa guidelines it Department of Interior and Local Government ukon DILG ag Epidemiologist and Infectious Disease Specialist, ro cadavers it mga pasyente nga namatay sa deadly virus hay dapat nga ma-cremate ukon maeubong sa sueod it 12 oras.
