KALIBO, Aklan—Nagpatigayun it virtual courtesy call si Pangueong Rodrigo Duterte para sa tatlong boksingero it nasyon nga nag-uli it nagkaeain-eain nga medalya halin sa kakatapos eamang nga 2020 Tokyo Olympics nga ginakabig nga the greatest show on earth.
Raya hay matapos nga makabalik eon sa nasyon sanday Olympics silver medalist Nesthy Petecio, silver medalist Carlo Paalam ag bronze medalist Eumir Marcial matapos ro makasaysayan nga kampanya sa olimpiyada.
Dikara, ginpasiguro it pangueo nga magabaton ro nasambit nga atleta it ro andang cash incentives maghalin sa gobyerno.
Si Petecio ag Paalam hay parehong magabaton it tig P5 million matapos nga makakuhit it silver medal samtang si Marcial hay pagataw-an it P2 million matapos nga makabuoe it bronze medal.
Eubos man ro kalipay it tatlong boksingero sa pagdayaw nga andang nabaton halin sa pinakamataas nga lider it nasyon.
Nag-abot sa Ninoy Aquino International Airport (NAIA) ro mga pambato sa boxing sakay it Philippine Airlines kaibahan sanday Irish Magno ag pilang mga opisyal it Philippine Olympic Committee.
