KALIBO, Aklan—Bantay-sarado makaron it Philippine Coast Guard (PCG) ro sangka pampasaherong barko matapos tamaan it COVID-19 ro 29 sa 82 kara nga tripulante.
Ro passenger vessel nga 2GO hay halin sa Caticlan sa Malay, Aklan antes nga nagdungka sa Batangas.
Suno sa PCG, presenteng sa Bauan Bay ro St. Anthony de Padua sakay ro 25 crew members nga naka-isolate nga kaabuan hay asymptomatic samtang ro iba hay may sangkiri nga sintoms it sakit.
May kaibahan sigon nga doktor ro mga raya para sa andang kinahangeanon nga medikal.
Tatlong iba pa ro gindaea sa ospital sa Batangas.
Padayun nga nagapatrolya ro PCG Station sa Batangas agud nga mag-bantay sa barko para masiguro nga owa it ibang watercraft ro makapaeapit ag owa it crew members nga makaghuwa nga owa it nagakaigo nga abiso.
Ginasugid nga antes nga nagbiyahe ro barko paagto sa Caticlan ko Agosto 1 agud nga maghatud it pasahero, sangka crew kara ro ginpapanaog sa Batangas City agud nga magpabueong bangud nga nakaexperiensiya it sintomas it COVID-19.
Matapos nga ipaidaeum sa RT-PCR test, natukiban nga 25 pa sa mga tripulante ro natapnan it sakit.
