KALIBO, Aklan—Naga-abot pa sa 175 ro aktibong kaso it Coronavirus Disease 2019 ukon COVID-19 sa banwa it Banga.
Suno kay Ms. Donnalyn Siyambio, tagapaghambae it Banga Municipal Inter-Agency Task Force (MIATF) nga raya hay matapos nga makalista sanda it 25 nga panibag-ong kaso ko adlaw it Biyernes.
Mag-eowas kara, kapin sa 65 pa sigon nga resulta it mga swab specimen ro pending sa makaron.
Suno kay Siyambio nga nagapadayun ro andang maidid nga contact tracing sa tanan nga close contact it mga pasyente.
Kaeabanan sigon sa mga raya hay magpamilya ag may gina-angkon nga sintomas.
Ro iba sigon sa mga COVID positive hay presenteng naka-isolate sa quarantine facility samtang ro iba hay naka-home quarantine bangud punuan eon ro mga pasilidad.
Ro Banga hay nakalista it kabilugan nga 841 nga kumpirmadong kaso it deadly virus umpisa nga magtuhaw ro pandemya.
Sa nasambit nga numero, 650 eon ro nagmayad matapos ro pagbueong ag quarantine procedure.
Sa pihak nga parte, pabor man si Siyambio nga mapaeawig pa ro ginapatuman nga “No Movement Sunday” sa banwa it Banga.
Nagaeaum sigon sanda nga pinaagi kara hay mabawasan ro numero it mga nagapositibo sa sakit sa andang banwa.
Apang, owa pa sigon nakapatigayun it pueong ro MIATF angot kara.
