KALIBO, Aklan—Matunog makarun ro pangaean it Filipino-Canadian multidisciplinary artist nga nakabase sa Toronto, Canada nga si Jason Zante matapos nga ma-featured sa Forbes, Architectural Digest, Complex magazine, Highsnobiety, Hypebeast, ag Artnet.
Nakahimo man raya it mga commissioned artwork para sa anang mga kliyente nga bukon eamang it basta-basta kungdi sa mga sikat nga mall ag personalidad kapareho ni Justin Bieber, Hailey Bieber, UFC’s Bruce Buffer, Cadillac Fairview Toronto Eaton Centre, Canadian Tire Jumpstart, ag ro Four Seasons Hotel Toronto.
Ro anang mga makolor ag mahayag nga illustrations hay nagasimbolo it porma, linya, ag ro gamit it mga kulay agud makapaabot it emosiyon sa sangka subject.
Ro paghalo-halo ag pag-imbento man it mga kulay ro pinaka-elemento it anang artwok.
Ro kaabuan man nga tema it anang artwork hay ro mga bagay nga makit-an eamang sa palibot adlaw-adlaw, ethereal landscapes, ag ro kultura it Pilipinas.
Samtang sa interbyu it Bombo Radyo Kalibo, ginpaabot it Filipino-Canadian multidisciplinary artist nga tubong banwa it Libacao ro anang kalipay bangud sa anang mga naabot makarun sa kabuhi.
Makabig sigon rayang sangka “dream come true” bangud umpisa nga 3 anyos pa eamang raya hay nakahiligan eun nana ro pag-drawing.
Kamatuoran sigon kara hay ro anang nanay permi ro anang number one fan sa anang mga artwork.
Kat 6 anyos eun sigon imaw hay nag migrate sanda sa Canada ag nagtuon sa OCAD University ag may unang bachelor’s degree sa Graphic Design.
Sa makarun hay sikat ag ginakilaea eun ro anang mga artwok bukon eamang it sa Canda kungdi pati man sa bilog nga kalibutan matapos sigon nga maging kliyente nana ro mga sikat nga personalidad ag international artist.
Samtang, sa pihak nga parte, gineaygayan ni Zante ro mga Pinoy nga may hilig ukon may talento pag-abot sa art.
Suno kana nga dapat hay indi eamang magpundo sa paghandom ag maghimakas agud nga matuman raya.
Sa mga pamatan-on man hay dapat sigon nga tapuson gid ro pagtuon agud nga makaangkon it nagakaigo nga disiplina.
