KALIBO, Aklan—Maswerteng naka-eowas ro sangka pamilya matapos ro pagtama it kilat sa andang baeay kasunod it pagbubu it mabaskog nga uean sa Brgy. Julita, Libacao.
Suno sa biktimang si John Peter Zubiaga nga bilog nga adlaw nga owa it suppy it kuryente sa andang banwa bangud sa ginapatigayun nga clearing operation it Aklan Electric Cooperative ukon Akelco.
Bandang alas-4 it hapon sigon kat nagbalik ro kuryente rason nga nagdesisyon sanda nga magcharge it cellphone kun siin owa kara ginaeauman ro pagtama it kilat sa andang baeay.
Partikular sigon nga tinamaan ro saksakan kun sa siin naka-charge ro anang cellphone.
Ro insidente hay nag-aywan it kahalitan sa andang mga outlet kamana man nga nagkautod-utod ro andang wiring.
Mag-eowas kara, nakaangkon man si Zubiaga it paso ag nakabatyag it pagpaminhod sa anang abaga kamana man nga indi haeos mahueag it anang magueang ro anang leog.
Sa pihak kara, ginapasaeamatan man it biktima nga owa sanda napuruhan sa insidente kun siin ginakabig eon nana raya nga pangaywang kabuhi.
