KALIBO, Aklan—Uman nga nagpaguwa it advisory ro Aklan Provincial Government may kaangtanan sa pag extend it operasyon it mga establisyemento ag mga tindahan nga maga umpisa alas 6:00 sa agahon hasta alas 5:00 sa hapon.
Raya hay sa pihak sa gihapon it ginapatuman nga modified enhanced community quarantine ukon MECQ hasta sa katapusan it Agosto.
Suno kay League of the Municipalities of the Philippines ukon LMP Aklan chapter president ag Ibajay mayor Jo-en Miraflores nga umpisa sa dating alas-4 it hapon hay ginhimo eun nga alas-5 ro pagsarado it mga establisiyemento agud nga mataw-an it oras ro mga nagatrabaho nga makapanindahan pa pagtapos it andang duty.
Raya man sigon ro naging desisyon it kaabuan sa mga minicipal mayors sa ginpatigayon nga meeting kahapon it Provincial Inter-agency task force.
Samtang, nagapabilin man nga ro office hours hay hasta it alas-4 sa hapon eamang kaibahan ro taeatapan it gobyerno samtang ro transport hay alas-6 it gabi-e.
