KALIBO, Aklan—Ginkumpirma it Banga Municipal Inter-Agency Task Force (MIATF) nga may gin-eubong sanda nga sangka pasyente nga namatay ag may gina-angkon nga pilang ka mga sintomas it COVID-19 apang owa pa matumod kun raya hay positibo sa virus.
Suno kay Ms. Donnalyn Siyambio, tagapaghambae it Banga MIATF nga ginahueat pa nanda ro resulta it ginbuoe nga swab sample sa 72-anyos nga eaeaking namatay.
Ro nasambit nga pasyente suno kana hay may comorbidity ukon diabetic kamana man nga naka-experiensya it ubo ag hapo antes binawian it kabuhi sa anda mismo nga baeay.
Ginklaro man kara nga nakaangkon sanda it nagakaigo nga koordinasyon sa pamilya kun siin nagpasugot man ro mga raya nga insigidang i-eubong ro bangkay.
Sa pihak kara, nag-abot eon sa 950 ro kabilugan nga kaso it COVID-19 sa banwa it Banga.
Sa nasambit nga numero, 838 eon ro eubusang nagmayad matapos ro pagbueong ag quarantine procedure.
Samtang, 23 eon ro namatay ag 89 pa ro nabilin nga aktibong kaso.
