KALIBO, Aklan—Ginakabaeak-an makaron ro kahimtangan it nabilin pa nga mga Filipino sa Afghanistan pagkatapos it gintaeana nga deadline kaina bandang alas-3:30 it aga-aga, oras sa Pilipinas.
Nasayuran nga makaron nga adlaw, Agosto 31 hay pormal eon nga gin-withdraw it Estados Unidos ro andang combat troops halin sa nasambit nga nasyon.
Sa interview it Bombo Radyo Kalibo, ginpahayag ni Bombo International Correspondent Joseph Glenn Gumpal, presidente it grupo it Filipino community nga ginatawag nga Samahang Pilipino sa Afghanistan nga kapin sa 15 pa nga mga Pinoy ro nabilin sa Afghanistan.
Pila suno kana sa mga raya hay nagpamalibad nga mag-uli samtang ro iba hay napas-eawan nga makahingabot sa pagsakay sa mga chartered plane sa Kabul para sa evacuation.
Gindugang pa ni Gumpal nga posibleng maigpit sanda sa giyera bangud sa naga-init nga tensyon sa tunga it bag-ong resistance movement nga northern alliance sa panjshir ag rehimen it Taliban.
Delikado eon sigon sa Kabul bangud nga mag-eowas nga bantay-sarado it mga Taliban ro mga kalye hay naga-house-to-house pa sanda.
Sa pihak nga parte, bangud sa pagsakop it Taliban, natabunan eon sigon ro isyu it delta variant it covid 19 sa Afghanistan.
Maabu suno kana ro kaso idtu it delta variant antes ro insidente kun sa siin ro mga ospital hay nagaka-ubusan eon it oxygen.
Samtang, ginsaysay man ni Gumpal kon paalin imaw nga nagpaeagiw sa Afghanistan kaibahan ro mga refugees.
