KALIBO, Aklan—Agud nga mabatian ro andang sentimyento, nagpatigayun it hub-eag protesta ro mga healthcare workers it Dr. Rafael S. Tumbukon Memorial Hospital (DRSTMH) bitbit ro andang mga placard.
Ginapaninggitan it mga health workers ro andang Special Risk Allowance (SRA), hazard pay, meal, accommodation ag transporation allowance nga hasta sa makaron hay owa pa maitao it Department of Health (DOH).
Suno kay Dr. Alistair Dela Cruz, presidente it Aklan Medical Society nga batyag nanda ro kagaoy ag sakripisyo it mga nurses nga padayun nga nagatao it serbisyo sa tunga it pandemya sa pihak it kueang nga sweldo ag benepisyo.
Ginpasiguro man kara nga suportado nanda ro mga tikang it health workers bangud maskin sandang mga doktor hay apektado man.
Madumduman nga nauna eon nga ginpasiguro ni Aklan Governor Florencio Miraflores nga mabaton eon it mga kwalipikadong health workers sa probinsya ro andang Special Risk Allowance antes matapos ro buean it Agosto.
Suno pa sa gobernador, makabaton sigon ro mga HCWs sa Aklan it hasta P5,000 nga monthly allowance sa pribado ag pampublikong ospital nga naga-alaga it mga pasyenteng may COVID-19 halin December 2020 hasta makaron nga dag-on.
