KALIBO, Aklan—Ginpaathag it Banga Multicab Association nga uman nandang pagabuhion ro nauna eon nga gindihon nga petesiyon angot sa mga tricycle nga nagabiyahe sa Brgy. Poblacion, Kalibo.
Suno kay Leandro Luciano, Presidente it Banga Multicab Association nga umpisa nga ginpaidaeom sa Modified Enhanced Community Quarantine (MECQ) ro bilog nga probinsya it Aklan hay medyo nabaliwala eon ro andang naging kasugtanan.
Nakabaehag sigon sa andang petesiyon nga pwede eamang maghatod it pasahero ro mga tricycle it Poblacion, Kalibo hasta it Shell gasoline station sa banwa it Banga kamana man nga indi sanda pwedeng magpick up it pasahero nga halin sa baryo hasta sa boundary it Brgy. Jumarap ag Linabuan Sur.
Naintindihan man sigon nanda ro sitwasyon eabi eon makaron kun siin nagakuliit ro kaabuan sa transport sector tuga it pag-instrikto bangud sa paeag it Coronavirus.
Apang, sa oras sigon nga maghaeuga eon ro restriction sa Aklan hay uman nandang iga-insister ro nasambit nga petesiyon.
