KALIBO, Aklan—Grabeng pagpangatoe sa haeos bilog nga eawas ro na-eksperyensahan it sangka senior citizen matapos nga sabwagan sigon it bueaeakaw.
Suno sa biktimang si Ruben Rubio, 65-anyos, residente it Brgy. Briones, Kalibo nga haeos daywang buean eon nana nga ginatiis ro pagpangatoe sa anang eawas.
Bangud sa problemang pinansyal, owa eon nahimo ni tatay Ruben nga magpakunsolta sa doktor ukon mag-adto sa ospital.
Nag-umpisa sigon ro pagpangatoe sa anang eawas kat mag-uli imaw sa Brgy. Briones matapos ro anang pagbisita sa Brgy. Sipac, Malinao.
Suno kana, ginpaadto imaw idto it anang tiya para magbuoe it social pension halin sa gobyerno.
Masobra daywang buean man sigon ro anang pagtinir sa nasambit nga lugar kun siin pagpangahoy eamang ro anang ginakasakuan.
Kapin sa limang ka mga albularyo eon sigon ro nagtan-aw kana apang hasta makaron hay owa gihapon nagmayad ro anang na-eksperyensyahan nga grabeng pagpangatoe sa eawas.
Kadungan kara, nag-apela it bulig si tatay Ruben para madaea imaw ospital bangud indi eon sigon nana matakuran ro anang kondisyon.
Dugang pa kara nga owa eon imaw it maayos nga tueog ag naga-dugo eon ro anang panit sa sobrang pagkinaaeot.
Samtang, ginapahayag man ni Annaliza Rubio nga maayos pa ro kahimtangan it anang ama kat maghalin raya sa andang baeay ko buean it Hulyo.
Owa sigon nanda ginaeauman ro natabo kay tatay Ruben.
Base sigon sa albularyo nga posibleng tumugpa ro tanan nga dalit it bueaeakaw kay tatay Ruben kat magpaligos raya sa suba.
Sa pihak kara, nagapanawagan man it bulig ro pamilya Rubio para sa gaeastuson medikal it andang padre-de-pamilya.
