KALIBO, Aklan—Ginkalipay it mga tag-ana it beauty salon ag barbershop ro uman nga pagpasugot nga magbukas ro andang operasyon umpisa sa Setyembre 8 kasunod it pagbutang sa Aklan sa General Community Quarantine ukon GCQ.
Suno kay Asia Adriana Ybarra, tag-ana it beauty salon nga naging mabudlay ro andang sitwasyun eabi eon it anang mga staff sa nagtaliwan nga tatlong buean bangud sa kawad-an it kita matapos nga ginbutang ro probinsiya sa MECQ.
Hasta sa makaron hay owa pa sigon nanda nabaton ro ginpromisa kanda nga bulig it gobyerno.
Samtang, maswerte man suno kana imaw bangud sa gintau nga konsiderasyon it tag-ana it anang ginarentahan nga pwesto matapos nga ginbawasan ro anang bayad.
Nagapati man imaw nga maskin naka-GCQ eon ro Aklan, magapabilin nga mahina ro andang kita bangud sa age restrictions kun sa siin bawae gihapon nga makaguwa ro mga senior citizens ag ro mga naga-edad 18 panaba.
Sa pihak kara, pagahueaton sigon nana ro igapaguwa nga executive order ni Aklan Governor Florencio Miraflores.
