KALIBO, Aklan—Naka-alerto makaron ro tanan nga Municipal Disaster Risk Reduction Office (MDRRMO) sa 17 kabanwahanan sa probinsya it Aklan sa pagmonitor sa sitwasyon it Aklan river kasunod it pagpanaeasa it bagyong Jolina.
Base sa pinakaulihing weather bulliten it PAGASA, nagapabilin sa tropical cyclone wind signal number 1 ro probinsya it Aklan.
Ginpahayag ni Edito Tapayan it MDRRMO-Libacao nga owa man haeos it paghueag sa tubi it Aklan river sa banwa it Libacao.
Nagapabilin suno kana nga manabaw ro tubi sa pihak it pagbubu it uean.
Ginpabugae pa ni Tapayan nga preparado ro andang mga miyembro kamana man nga owa pa it nailistang kahalitan tuga it pagpanaeasa it bagyo.
Sa pihak kara, padayun sigon ro andang pagbantay sa mga kasubaan it banwa agud masigurong eowas ro mga residente eabi eon ro naka-istar sa coastal areas.
Samtang, sa pihak nga parte, ginpaathag man ni MDRRMO-Kalibo Head Terrence Jun Toriano nga mag-eowas sa pag-monitor sa mga kasubaan hay nakatutok man sanda sa mga kalye sa banwa it Kalibo.
Suno kana, ginaproblemahan nanda makaron ro pagtaas it tubi-baha sa mga nagapangunang daeanon bangud sa sigidas nga pagbubu it uean nga daea it bagyong Jolina.
