KALIBO, Aklan—Nagpaandam ro Bangko Sentral ng Pilipinas ukon BSP sa publiko kontra sa mga peke nga kwartang pwedeng magkalhit makaron nga nagahilapit eon ro tiempo it kapaskwahan.
Ginlaygayan ni Ma. Karenz Odchigue, Bank Officer II ag Information Officer it BSP Roxas Branch nga usisaon it mayad ro mga mabaton nga kwartang papel agud nga masiguro nga bukon it peke ro mga raya.
May tatlong pamaagi sigon agud nga mausisa kon peke ro ginabuytan nga kwarta pinaagi sa “feel, look ag tilt” method.
Ro feel ukon pagsalat sa kwartang papel hay magaeas bangud sa ginagamit nga materyales kara ag ro mga naka-embossed nga imprenta samtang ro look man hay ro pag-usoy sa mga security feature it kwarta kapareho it embossed prints, watermark, security fibers, asymmetric serial numbers ag mga see-through mark kara nga malisod nga peke-on.
Ro tilt man hay ro pagbalikwas sa kwarta agud nga usuyon ro nakatago nga value kara nga nagiging visible kon ro banknote hay ginapatiyog-tiyog it 45 degrees ag ginatikwas.
Kadungan kara, gin engganyo man nana ro publiko nga engkasong makakita it mga pekeng kwarta ukon nagaduda kon matuod ukon peke hay pwedeng mag agto ag ipakita raya sa anuman nga taeatapan it BSP.
