KALIBO, Aklan—Nagapati ro grupo it Bayan Muna Panay nga ro tuyo ni Pangueong Rodrigo Duterte sa pagdaeagan bilang bise presidente sa May 9, 2022 national and local elections hay para daeaganan ro mga kaso nga nagahueat kana.
Raya hay matapos ro kumpirmasyon ag pagbaton it pangueo sa nominasyon it partidong PDP-Laban kana bilang running mate ni Senator Christopher “Bong” Go sa ginpatigayun nga national convention sa Pampanga ko nagtaliwan nga adlaw.
Suno kay Bryan Bosque, Chair it Bayan Muna Panay nga maabo nga mga kaso ro nakataeana nga paga-atubangon it pangueo sa pagtapos it anang termino sa masunod nga dag-on.
Sambilog eon sigon kara ro isyu sa war on drugs it administrasyon nga ginkamatay it pilang libong indibidwal kun siin ro iba kanda hay gina-alegar nga inosente.
Raya man sigon ro nagtueod sa International Criminal Court nga iduso ro imbestigasyon.
Nagaeaum sigon sanda nga magapangibabaw gihapon ro kamatuoran ag matuldukan eon ro bulok nga pagdumaea ukon sistema sa gobyerno.
