KALIBO, Aklan—Nagapati si Atty. Plaridel Morania, sangka batikang abogado sa Aklan nga maeawig pa nga proseso antes nga maumpisahan it International Criminal Court ukon ICC ro andang ginahambae nga pag-imbestiga sa kampanya sa iligal nga droga ni Pangueong Rodrigo Duterte.
Raya hay kasunod it pahayag nga ginpasugtan eon it pre-trial chamber ro hinyu it ICC Prosecutors nga padayunon ro imbestigasyon sa Oktubre sa drug war sa nasyon umpisa Hulyo 2016 kat magpungko sa puwesto si Pangueong Duterte hasta Marso 16, 2019 kat mag-withdraw ro Pilipinas halin sa Rome Statute.
Suno kay Atty. Morania nga samtang naga-gana ro husgado sa nasyon hay owa it kinamatarung ro mga husgado it ibang organisasyon kapareho it UN ag ICC nga magbista sa kaso it pangueo.
Apang raya sigon hay ginatratar bangud sa mga kaso nga ginpasaka idtu it mga naging biktima it war on drugs, kun sa siin , mabahoe ro andang pagpati nga indi makabo-oe it hustisya sa lokal nga korte bangud nga ro ginakiha hay ro incumbent president it nasyon ag may immunity from suit pa.
Medyu mabudlayan man sigon ro ICC sa pagahimuon nga imbestigasyon kon owa it kooperasyon ro mga otoridad.
Nasayuran nga sakop it imbestigasyon ro paeatyan sa Davao City umpisa Nobyembre 2011 hasta Hunyo 30, 2016 kun sa siin nakapungko nga mayor ag vice mayor kato si Duterte.
Gina-insister it ICC nga pag-eabag sa tawhanong kinamatarung ro nasambit nga war on drugs maskin nga makapilang beses eon nga ginhambae it mga otoridad nga raya hay legal nga operasyon.
Ginatantiya nga naga-abot sa 7,000 ro naging biktima it war on drugs ni Duterte.
