KALIBO, Aklan—Ginbuoe it Municipal Health Office (MHO)-Kalibo ro pagkabaeaka it publiko nga nakabaton it 1st dose it Sputnik V vaccine nga himo it Russia.
Ginpasiguro ni Hernan Lorenz Laserna, Nurse II it MHO-Kalibo nga makabaton it andang 2nd dose ro mga pumueoyo nga nauna eon nga naturukan it nasambit nga bakuna ko mga nagtaliwan nga buean.
Suno kay Laserna, may nag-abot eon nga inisyal nga masobra 500 nga Sputnik V vaccine base sa kumpirmasyon it Aklan Provincial Health Office rason nga owa it dapat ikabaeaka ro publiko.
Tanan sigon hay magabaton it 2nd dose apang kinahang-ean eang anay nga maghueat bangud sa kakueangan it suplay it bakuna.
Angot kara, naga-abot eon sigon sa masobra 16,000 ro mga pumueoyo sa banwa it Kalibo nga nabakunahan kontra COVID-19.
Sa nasambit nga numero, kapin sa 4,900 ro naturukan it 1st dose samtang masobra 11,000 ro fully vaccinated ukon nakabaton it 2nd dose.
Aminado si Laserna nga maeayo pa raya sa target it lokal nga gobyerno nga 50,000 para maabot ro ginahandom nga herd immunity.
Kadungan kara, nag-apela man raya nga madugangan ro alokasyon nga bakuna it Kalibo agud mapadasig ro vaccination rollout bangud ginakabig raya nga battle ground it virus sa probinsya.
Sa makaron, may 52 pa nga nabilin nga aktibong kaso it deadly virus ro Kalibo.
