KALIBO, Aklan—Pursigido ro banwa it Libacao nga maeakip bilang sambilog sa mga tourist destination sa probinsiya it Aklan.
Suno kay Libacao mayor Charito Navarrosa nga sa makaron hay natigayon eon nanda nga maayos ro peace and order ag nausuyan it pondo ro pagpa-ayos ag pagpaeapad sa mga daeanon paagto sa mga gina-develop nga eco-tourism sites nga una sa andang hurisdiksyon.
Parikular sigon nga gina-agtunan makaron it mga tawo hay ro view deck nga nahamtang sa pinaka-alipunto it bukid, kun sa siin makita ro manami nga view kamana man ro madamoe nga kagueangan ag maeamig nga paniempo nga kapareho it Baguio City.
Ginpabugae man ni Mayor Navarrosa ro maabu nanda nga mga manami nga water falls sa banwa kun sa siin ro naga-ilig sigon nga maeamig nga tubi hay mayad para sa hydro massage, hydro therapy ag footspa.
Samtang, may may mga nagakatabu man sigon nga landslide apang madasig man nga nalimpyuhan it Provincial Engineering Office.
Sa pihak nga parte, kasado eon man sigon ro andang official line-up sa maabot nga eleksyon sa idaeum it Tibyog Akean.
