KALIBO, Aklan—Nagapabilin nga una sa ‘low risk classification’ ro Aklan base sa mga datos ag trend it COVID-19 sa probinsiya.
Suno kay Dr. Cornelio Cuatchon, Jr. it Provincial Health Office ukon PHO-Aklan nga ginbutang eon sa low risk ro Aklan bangud sa padayun nga pagnaba it mga bag-ong kaso sa nagtaliwan nga daywang domingo nga nag-abot sa “minus” 135% samtang nagnaba man sa 3.2 ro ADAR ukon Average Daily Attack Rate.
Ro health care utilization rate hay 12.68%.
Mabahoe man suno kana ro posiblidad nga mabutang ro Aklan sa Modified General Community Quarantine ukon MGCQ kon magadere-deretso ro pagnaba it mga kaso.
Sa pihak kara, indi sigon dapat nga maging kampante bangud nga nakabutang pa sa high risk ro bilog nga western visayas ag may mga nailistang bag-ong mga kaso it ginakabig nga variants of concern partikular ro makataeapon nga delta variant.
Samtang, gindugang ni Dr. Cuatchon nga as of Sept. 20, may 11 nga bag-ong positibong kaso nga nailista sa aklan rason nga nag-abot eon sa 12,350 ro kabilugan nga kaso umpisa nga magtuhaw ro pandemya.
Sa nasambit nga numero, 98% ro nagmayad ag 303 ro aktibong kaso.
Samtang, gin engganyo man nana ro tanan nga mga pumueuyu nga magbakuna eon kontra covid 19 matapos nga dere-deretso sigon ro andang ginapatigayon nga vaccination roll-out sa probinisya.
