KALIBO, Aklan—Owa nagapati si Engr. Valentin Teodosio it Mines & Geosciences Development Services it Aklan Environment and Natural Resources Office ukon AKENRO nga bangud eamang sa overloaded nga mga truck nga kargado it baeas rason nga pirmeng nagaka-guba ro barangay road sa parte it Bacan sa banwa it Banga.
Suno kana nga maabu nga factor kon ham-an nga nagakasamad ro mga karsada ag bukon eamang ro overloaded nga mga trucking kapareho it gina-insister it Provincial Engineering Office.
Gindugang pa ni Engr. Teodosio nga may nagakaigo sanda nga checker sa lugar agud nga mag-monitor it mga naga-agi nga saeakyan.
Nakasayod man sigon ro driver it mga nagahakot it baeas nga kon magsobra ro andang karga sa 15 cubic hay may nagakaigo raya nga multa.
Kaeabanan sa mga truck nga naga-agi sa lugar hay halin sa quarry site sa barangay taba-ao, badiangan ag iba pang lugar ag may nagakaigo nga permit halin sa andang opisina nga gina-deliver bukon eamang sa Aklan kundi sa Capiz ag Iloilo.
Nagapati man si Engr. Teodosio nga kinahangean nga mabutangan it drainage system sa lugar agud nga indi magpunpun ro tubi nga sambilog sigon sa mga posibleng rason it madali nga pagkasamad it karsada.
Madumduman nga nauna eon nga ginareklamo it mga opisyal, residente ag mga motorista ro pirme ag haeos owa it katapusan nga pag-repair sa karsada sa lugar nga makabig nga takaw-disgrasya.
