KALIBO, Aklan—Naging maayos ro unang adlaw it pagdihon it Certificate of Candidacy (COC) it mga maga-kandidato sa maabot nga 2022 local and national elections.
Suno kay Crispin Raymund Gerardo, tagapaghambae it Commission on Elections ukon Comelec-Aklan nga daywang domingo antes ro filing it COC hay naging preparado eon ro andang taeatapan.
Ginpahayag pa kara nga maabu nga mga pagbag-o sa proseso it COC filing, kapareho it bag-ong venue ag hugut nga pagpatuman it health and safety protocols tuga it nagapadayun nga paeag it COVID-19 pandemic.
Imbes nga sa taeatapan it Provincial supervisor, sa gymnasium it Aklan Catholic College sa Roxas Avenue Kalibo ginbaton ag ginproseso ro mga COC it mga magapadaeagan sa provincial positions kapareho it sangguniang panlalawigan, vice governor, governor ag representante it 1st ag 2nd district it Aklan.
Gindugang pa ni Gerardo nga may gintaeana man sanda nga reserved venues agud nga engkaso nga makaangkon it problema hay may insigida sanda nga pagasayluhan.
Magabuhay suno kana hasta sa oktubre 8 ro pagdihon it COC nga kadungan man sa pagdihon it certificate of nomination and acceptance ukon CONA.
Bukas sigon ro mga Comelec offices umpisa alas 8 it agahon hasta alas 5 it hapon kamana man sa sabado ag domingo.
Samtang, ro election period hay maga-umpisa sa Enero hasta Hunyo 2022.
