KALIBO, Aklan—Nagapabilin nga maeanghay ro ikaywang adlaw it pagdihon it certificates of candidacy (COC) sa Aklan Catholic College gym, ro venue nga gintaeana it Commission on Elections ukon Comelec-Aklan.
Nasayuran nga sa unang adlaw it filing it COC kahapon, Oktubre 1 hay naging kalmado raya matapos nga daywang kandidato eamang ro nag-agto nga ginaeakipan ni 2nd district congressional aspirant retired army Lt. Matt Wacan ag pasado alas-4 it hapon hay nag-abot man si Ricardo Agrabante nga magapadaeagan bilang independent candidate nga sangguniang panlalawigan member sa 1st district.
Sangka journalist nga nagpakilaea kay Jethro Laserna ro nag-inquire man kaina it agahon para sa mga kinahangeanon nga dokumento sa pag-file it COC sa pagka-board member sa unang distrito.
Aminado ro Comelec base sa andang experiensiya nga sa unang tatlong adlaw it filing it COC hay owa it masyadong kandidato nga naga-abot , kun sa siin kaeabanan nga nagabuhos sigon ro mga raya sa nabilin nga mga inadlaw bangud sa ginasunod nga mga talimad-on samtang ro iba hay gusto nga dueueungan sanda it andang grupo.
Nauna eon nga ginhinyu it komisyon sa mga kandidato nga maging organisado ag magsunod sa gintaeana nga health and safety protocol kontra covid 19.
Ro filing it COC hay maga-umpisa alas-8 it agahon hasta alas-5 it hapon nga magatapos sa Oktubre 8, Biyernes nga adlaw.
