KALIBO, Aklan—Nakalista eamang ro Aklan Provincial Epidemiological and Surveillance Unit it lima ka mga bag-ong kaso it Coronavirus Disease 2019 ukon COVID-19 sa bilog nga probinsya it Aklan halin sa kabilugang 44 nga swab samples nga gin-test ko Oktobre 4.
Sa nasambit nga numero, 39 ro nagnegatibo rason nga 11 porsyento eamang ro nailistang positivity rate.
Sa kabilugan, humampak eon sa 12,511 ro kaso it COVID-19 sa probinsya umpisa nga magtuhaw ro pandemya.
Sa pihak kara, sumaka eon sa 12,095 ro mga nagmayad matapos ro pagbueong ag quarantine procedure.
Samtang, nag-abot eon sa 315 ro numero it mga namatay matapos dapuan it COVID-19 infection.
Sa makaron, 101 pa ro nabilin nga aktibong kaso it sakit nga ginakaeakipan it 77 nga naka-facility quarantine, 11 nga naka-home quarantine ag 13 nga admitted sa ospital.
