KALIBO, Aklan—Ginpangunahan ni Sangguniang Panlalawigan member Juris Bautista Sucro kaibahan ro anang grupo sa ‘Tibyog Akean’ ro pagdihon it andang Certificate of Candidacy (COC) kaina it agahon sa katapusan nga adlaw it COC filing sa taeatapan it municipal Comelec it Kalibo.
Personal nga gindihon ni Sucro ro anang COC kaibahan ro anang pamilya ag running mate nga si Dr. Cynthia dela Cruz nga nagdihon man it anang kandidatura bilang vice-mayor para sa ikaywang termino kamana man ro mga konsehal nga miyembro it nasambit nga grupo.
Engkaso nga magdaog sa maabot nga eleksyon, raya sigon ro anang unang kahigayunan nga magapungko sa ehekutibo.
Suno kay Sucro nga ginapromisa nana nga kon paearon, umpisa day 1 it andang pagserbisyo kaibahan ro anang grupo hay magiging masako ro andang pagtrabaho.
Indi sigon magiging sabeag ro pandemya it COVID-19 sa andang plataporma nga magatau it garantiya nga madaling mapaeapitan ag maayos nga pagserbisyo sa mga tawo.
Kaibahan man nanda nga nagdihon it andang COC si dating Vice Mayor Madeline Regalado nga magapadaeagan bilang konsehal.
Samtang, ginpahayag ni incumbent Vice mayor Cynthia dela Cruz nga indi nana pagatalikuran ro anang mga naumpisahan nga mayad nga performance ag pagserbisyo sa mga pumueuyu eabi eon makaron nga tiempo it pandemya.
