KALIBO, Aklan—Ginatun-an eon makaron it Commission on Higher Education (CHED) ro posibilidad it pagpatigayun it limited face-to-face classes sa tanan nga degree programs sa tunga gihapon it pagpanaeasa it COVID-19 pandemic.
Apang, suno kay CHED Chairman Prospero De Vera III, ro andang plano hay para eamang sa mga lugar nga may manaba nga kaso it virus ag mataas ro vaccination rates.
Suno kana, ro pagpatigayun it face-to-face classes sa mga lugar nga manaba ro kaso it covid hay nakasalalay pa gihapon sa mga local government units (LGUs).
Pagatestingan man sigon nanda nga makipag-angot sa mga LGUs nga may una nga mataas nga vaccination rate ag mga lugar nga manaba ro classification it COVID-19 para makapatigayun it face-to-face classes sa mga masunod nga buean.
Ginpasiguro man ni De Vera nga kinahang-ean nga sundon it mga eskwelahan ro minimum health protocols nga gintaeana it Inter Agency Task Force (IATF) engkaso nga magpatigayun it klase sa mga mapili nga lugar.
Sa makaron, ginapasugtan eamang ro face-to-face classes sa tertiary level apang para eamang sa mga medicine ag allied health sciences.
Kung madumduman, una eon nga gin-anunsyo it Department of Education (DepEd) ro inisyal nga pagpili sa 59 nga pampublikong mga eskwelahan sa nasyon para sa pagahimuon nga face-to-face classes.
Ro pilot implementation it face-to-face classes hay igapatuman sa sueod it daywang buean ag target rayang umpisahan sa Nobyembre 15, 2021.
