KALIBO, AKlan—Ginreklamo sa Bombo Radyo it sangka residente sa Barangay Jumarap, Banga ro madanlog nga daean bangud sa aspalto nga imaw ro ginapatihan nga rason it nagakatabong aksidente sa nasambitan nga lugar.
Suno sa tagreklamo nga si Reynaldo Siason nga sa sueod it 42 anyos nana nga pag-istar sa nasambitan nga lugar hay haeos maabo eun man imaw nga nasaksihan nga mga saeakyan ag motorsiklong gulpi eamang nga nagakadisgrasya.
Bangud kara hay nabutang man sigon sa peligro ro andang kabuhi bangud sa gulpi-gulpi eamang nga may nagakabunggo maeapit sa andang panimaeay.
Dugang pa ni Siason nga naga-abot eun it haeos limang dag-on ro andang pag-antos sa nasambitan nga daeanon.
Samtang, sa pihak nga parte, ginpasiguro man ni Mr. Almond Joy Trinidad, Maintenance foreman it Department of Public Works and Highways (DPWH-Aklan) nga andang iga-repair ro nasambitan nga karsada.
Magahimo man sigon it nagakaigo nga aksiyon ro DPWH agud nga maayos raya sa mas madasig nga tiyempo.
