KALIBO, Aklan—Ginklaru ni Aklan Provincial Administrator Atty. Selwyn Ibarreta nga kinahangean nga vaccination certificate ukon LGU vaccination card nga may QR code ro pagabatunon agud nga eubusan nga maka-uli sa probinsiya ro mga returning Aklanons.
Raya hay kasunod it advisory nga ginpaguwa ni Aklan Governor Florencio Miraflores nga may petsang October 21, 2021 kun sa siin gina-obliga ro mga returning aklanons nga magpakita it pruweba nga sanda hay fully vaccinated eon kabaylo it negatibong RT-PCR test results.
Dugang pa ni Atty. Ibarreta nga ro vaccination card nga gin-isyu it anuman nga local government units halin sa aklan hay andang ginabaton.
Apang ro gin-isyu halin sa ibang probinsiya hay kinahangean pa nga maberipika.
Ro vaccination certificate sigon hay may nagakaigo eon nga QR code ag pwede raya nga ma-download sa website it department of information and technology ukon DICT.
Suno kana nga tuyo eamang kara nga makasigurado nga ro gina presentar nga vaccination card hay bukon it peke.
Samtang, bukon man sigon it required makaron ro S-Pass halin sa mga biyahero pauli sa probinsiya ag mga turista paagto sa Boracay.
Ro indi makasunod sa requirements hay obligado gihapon nga magpakita it negatibong swab test result.
